Puisi-puisi Ida Bagus Gde Surya Bharata | Meseh Lawang

MESEH LAWANG

Nuju dinane anu
lampahe napak lawangan
nilar pekarangan
ngapti segere tan mari lali

napak lawangane di arep
anggane matureksa
sungkan tan pasangkan
meduuh aduh tan pegatan

lawangane ngembak nampi
sarira lantur kakasturi
sekaa siki sampun metampi
cihna sungkane dahat jati

dinane mesalin lawange meganti
sangkane sungsut
aptine sing katinut
ketekane nuwut

panamayane ngangsyut
di lawange tanpa sikut
kedeh tatas kenak
sabilang lawange ketapak

kalane sangkan paran
dumadi menadi dadi
lawange meganti
tresna lascarya subakti

mewastu manahe kambang
nembangang maskumambang
nundun sabilang lawange
ne kasambatang

minggune mesalin bulan
lawange teka tinggal
ngacep kenak ngelangkungin
masane atiban kuang
meseh masa meseh lawang

margi sunia katemuang
di pitung dasane nanggu
telu lemeng nyujur
pitung dasa tiban
yusanye tan mekanti
Ida Betari memargi

(katulis ring solas april
warsane kalih tali enem likur
rahajeng wanti warsa)

PETENG PITU

Langite dedet tanpa bulan
Wengine dabdab miletin peteng
Nuntun manahe mapineh teneng
Sinalih tunggil nyeneng meneng

Sapta timira sambat ngatiban
Surupa makanten ayu baguse
Dhana ngantenang kasugihan brana
Guna ngandelang kasujatian kawisesan

Pongah baan nyaluk luhure
Nguni kulina kaucap
Ngandel yowanane
Lampah ngampahang
Sura tan sida nambakin indriane
Kasuran pamekas tan pa tandingan

Purwani tilem nepek sasihe kapitu
Siwaratri sane kawikanin tuhu
Ngalebur dosa karmane imalu
Nyujur sekalane sida rahayu

Hyang Siwane mayoga peling
Ngarad panjak nemu eling
Sekalane di petenge pitu
Di ukudan nyelisik adining satru

Siwaratri, 9 Januari 2024

ELUNG METULUNG

Tepuk di rurunge suung
Luntang-lantung layu masemita
Kadi balunge katinggal
tan ada nanggal tur marungu

Lawase masatua bawak
Nundun ilikitane imalu
Daweg madeg kadi ratu
Maketu tuhu kagugu

Makejang parek manjak
Galak makpak sehanan tulak
Mearad arad ne jerih matinjak
Lipia ngenjek gumine kapetak

Satak nanggu setiman dosane kasambat
Karmane ngejoh masane masalin
Sentanane mejantos ninggalin
Tan purun tampek jerih
Elung matulung

Banyuning, 22 Januari 2024

.

Penulis: Ida Bagus Gde Surya Bharata
Editor: Adnyana Ole