Ni Widi adane dugas Sukreni enu cenik. Memene madan Men Widi sawireh panakne madan Ni Widi. Disubane gede, Men Widi tusing taen nepukin Ni Widi ulian Men Widi suba tusing enu bareng-bareng nongos. Lantas Men Widi ngelah panak madan I Negara ajak Ni Negari. Ento mawinan, Men Widi maganti adan madan Men Negara. Men Negara! Keto anake makaukan jani.
Ada mantri Polisi madan I Gusti Made Tusan. Kaliwat edotne teken Sukreni. Men Negara, ane tusing nawang Sukreni ento pianakne, raris ngelah ekan-ekan apanga Sukreni nyak ajak I Gusti Made Tusan, mantri Polisine totonan. Di petenge ento, Sukreni parikosana teken I Gusti Made Tusan. Ulian ento Sukreni beling, tur ngalekadang pianak madan I Gustam.
I Gustam bikasne jele. Apa buin maan makrangkeng. Suba kaloktah basangne bawakan teken kancing jaum. Makeneh megal di warungne Men Negara. I Gusti Made Tusan ane dadi mantri Polisi, mulan swadharmane ngejuk anak ane durjana. I Gusti Made Tusan lan I Gustam, masiat saling tusuk, saling sepeg aji klewang. Pamuputne I Gustam kena klewangne I Gusti Made Tusan, ane tusing ada len tuah Ajinne.
Amonto dogen baca satuan Sukrenine, kenehe suba pasti nyak cara benang layangan pelih baan ngulung. Tawang engken? Buut. Yen sing nawang buut, ruwet. Yen sing nawang ruwet, makalukan. Sing nawang makalukan? Beh… Ngopi malu brurrr…
Sambilang ngopi, jani keneh-kenehang apa ane suba bakat pabalih dibi di abian senter? Kelompok Sekali Pentas, nyatuang Sukreni Gadis Bali pakardinida Anak Agung Pandji Tisna. Murdan dramane dibi Sukreni Wang Sistri Listuayu.
Uli murda utawi judule ento, suba sinah ane lakar satuanga undukne I Sukreni. Sakewala yen alih di kamuse, tusing ada kruna
Sistri, yen Stri mara ada. Artine anak luh. Kewala tusing engken, biasa ento ngae kruna apang nyak lengut dingeh. Eda magenep runguanga.
Patuh cara di dramane ento misi kruna basa kasar cara kruna Bangsat, sing engken! Adane suba balihbalihan. Biaso gen joo. Diapin ditu ada sulinggih ane nonton, santai dogen. Nak ida ane suba wikan, tusing kena cemer baan kruna ane cara angin. Dija ada unduk, anake sai masucian, kapetengan baan tampiasan yeh ujan.
Uli basa Bali ane anggona, ada ane dingeh cadot. Mirib tusing makejang sabilang wai nganggon basa Bali yen ngorta ajak timpal-timpalne. Mulan kewehan abedik ngomong Bali, apa buin musti nganutin sor singgih.
Contone, yen ngorahang ratu teken I Gusti Made Tusan, patute ngalantur nganggon basa alus. Umahne I Gusti Made Tusan ganti aji Purine I Gusti Made Tusan. Keto salanturne, apa buin ada dialog Sukreni ngajak I Gde Suamba. Ditu nyidayang buin ngalengutang aji basa Bali alus sajan-sajan. Yen Sukreni dot ngorahang “cepatlah [enggal]” cara di basa Indonesia, patute misi pangiring “-ang”. Dadine enggalang. Ento teknis basa Baline. Dadi plajahin anggon mani puan.
Yen suba kelompok Sekali Pentase ento maigelan [yen dadi orang ngigel], musti cara uug gumine. Ane mabalih ajak liu, apa buin praginane misi nyeluksuk ka tongos anake mabalih. Ento ane ngranayang nyak rame gumine. Yen nulad basa para wikane, mulan sasolahan ento ngalih apang nyak ramya. Yen suba rame, aluhan ngalih sepi!
Gegendingane makejang melah-melah. Buina juru musike, misi ngorta ajak praginane. Di tipi-tipine taen tepuk ane buka keto, kewala engsap dija kaden bakat pabalih. Ento madan kreatip.
Ane paling tusing demenin adegane, tuah dugas Sukreni nagih parikosana ajak I Gusti Made Tusan. Batise grinjit-grinjit, dot nulungin Sukreni. Nyen sih ane tusing dot nulungin anak jegeg listuayu buin misi solahne aris? Aris ento len ajak arisan. Aris ento artine alus.
Gedeg sajan basange, makita nyekuk baongne I Gusti Made Tusan. Nas bedag polone! Apa buin misi ningehang Sukreni ane jegeg magledag totonan ngeling katulung-tulung. Mimih dewa ratu agung!
Sakewala ada masih lucune. Ane ngae kedek ingkel-ingkel. Taen nepukin celeng miegan ajak celeng? Nah, ada adegan misi keto, Men Negara di satuane ento, ngelah bodi seksih. Ada masih pangabihne I Gusti Made Tusan ane tusing kalah seksih. Buka dua ento miegan, nyak paturu seksih. Monto seksih bodine, di dramane orahanga paturu celeng.
Unduk kalangan dramane, tusing buin sandang omongang dini. Jero-jero maka sami juru benehin kalangan, suba wikan-wikan. Ada masih ane ngesiabin, jero-jero juru benahin kalangane ento, bareng main drama. Dengak-dengok ngintip Ni Negari ane mula sadah jaliran di satuane. Ni Negari nyak menceng, buin misi cara uled nangka. Kletak-kletik mai kemu, ngedot-ngedotin anake apang nyak mablanja meli kopi. Tiang di tongose mabalih, tusing tanjenina kopi. Ukane kauk-kauk, kopi sik luh, sing misi gula. Kan gulanya kamu. Keto rare-rarene ane mapanganggo murid SD ngrayu Ni Negari.
Yen timpal-timpale ane ngurusang lampu, kalangan, banten, panganggo, payasan, maka miwah ane lenan, tur ane maya-maya cara sutradara ajak kepalane, sinah tusing nyidayang ngortang. Engkenang carane ngortang, katungkul iteh tiang mabalih I Sukreni, engsap lakar misi nulis.
Cutetne mulan dueg timpal-timpal Sekali Pentase. Tiang ane mabalih cara ilang uli gumine, yen dija kaden atmane malecat dugas ento. Apa buin, misi ditu nyama selam nganggo busana nganutin tata carane. Tiang iteh dogen nlektekang ane keto-keto, kuda kengken anak enu masih orahang nyama. Sakewala tuah mulan jamane jani anake liunan engsap teken nyamane padidi.
Ada ane patut catet buin abedik uli dramane dibi. Anak ane dot nawang engken sujatine satuan Sukreni, patut maca buin cepok satuan Sukreni. Sawireh yen tingalin dibi, ada ane cara pegat di satuane. I Gustam ento okane I Gusti Made Tusan, ento cara kuangan buin agigis apang nyak ngenah bun utawi sulur satuane.
Tulisan ene, suudang malu amone. Tiang tusing bisa ngomong liu-liu. Untengne, drama nganggon basa Bali, apa buin misi magending Bali, ento anak mulan keweh. Aget timpal-timpale di Kelompok Sekali Pentas ngidang ngulehang apang nyak satuane lengut, buin misi ngibur anake ane mabalih.
Apa tetujone ngibur? Apa buin lenan teken ngilangang duka! Anak mulan di gumine nenenan, suka-duka ane malingse [mapiteh, mapincer]. Sukane maan mabalih Kelompok Sekali Pentas, dukane oraina ngae tulisan. Sakewala yen suba buka kene, saru suka ajak dukane. [T]
